თბილისში, ზაჰესის დასახლებაში, მშვიდობის ქუჩაზე, ოფიციალურად გაიხსნა ქ. თბილისის 50-ე საბავშვო ბაღი — სამსართულიანი, თანამედროვე სტანდარტების შესაბამისი საგანმანათლებლო დაწესებულება, რომელიც სპეციალურადაა შექმნილი ბავშვების უსაფრთხოებისა და კომფორტისთვის.

🎈 გახსნის ღონისძიებას დაესწრო ქალაქის მერი, რომელმაც ბაღის ტერიტორია დაათვალიერა, გაესაუბრა ბაღის თანამშრომლებსა და მშობლებს და ადგილზე გაეცნო ახალი ობიექტის ინფრასტრუქტურას. პატარების ემოციამ ღონისძიებას განსაკუთრებული ხალისი შესძინა — ისინი სიხარულით ათვალიერებდნენ შენობას, ცოცხალი ინტერესით აღიქვამდნენ ახალ გარემოს და ცდილობდნენ რაც შეიძლება სწრაფად აეთვისებინათ ახალი ბაღი.

ბაღის საერთო ფართობი 2,412.32 მ²-ია და იგი გამოირჩევა თანამედროვე არქიტექტურითა და ბავშვებზე მაქსიმალურად მორგებული გარემოთი. შენობაში მოწყობილია მყუდრო, უსაფრთხო და შთამაგონებელი სასწავლო სივრცეები, ასევე ყველა საჭირო ტიპის დარბაზი, რაც ბავშვების მრავალმხრივ განვითარებას უწყობს ხელს.

განსაკუთრებული ყურადღება დაეთმო გარე ინფრასტრუქტურასაც — ბაღის ეზოში დამონტაჟებულია საქანელები, სასრიალოები და სხვადასხვა ტიპის სათამაშო კონსტრუქციები, რომლებიც ხელს უწყობს ბავშვების აქტიურ და მხიარულ ყოველდღიურობას. სივრცე დაგეგმილია ისე, რომ პატარებს შეეძლოთ უსაფრთხოდ თამაში, სოციალური ურთიერთობების ჩამოყალიბება და ფიზიკური უნარების განვითარება.